മഴക്കെടുതി: ഉന്നതതലയോഗം സ്ഥിതിഗതികള്‍ അവലോകനം ചെയ്തു; പ്രധാന കാര്യങ്ങള്‍ ഇവ

മഴക്കെടുതിയേക്കുറിച്ച് ചര്‍ച്ച ചെയ്യാനായി ചേര്‍ന്ന ഉന്നതതലയോഗം സ്ഥിതിഗതികള്‍ അവലോകനം ചെയ്തു. ഇതേക്കുറിച്ച് മുഖ്യമന്ത്രി സോഷ്യല്‍ മീഡിയയില്‍ കുറിച്ചു. അദ്ദേഹം പുറത്തുവിട്ട വിവരങ്ങള്‍ താഴെ വായിക്കാം.

പ്രളയത്തെത്തുടര്‍ന്നുള്ള രക്ഷാപ്രവര്‍ത്തനവും ദുരിതാശ്വാസ പ്രവര്‍ത്തനവും വേഗത്തിലാക്കണമെന്ന് നിര്‍ദേശിച്ചു. മഴക്കെടുതിയെത്തുടര്‍ന്നുള്ള സ്ഥിതിഗതികള്‍ അവലോകനം ചെയ്യാന്‍ ചേര്‍ന്ന ഉന്നതതലയോഗത്തില്‍ സംസാരിച്ചു.

കാലവര്‍ഷക്കെടുതിയെത്തുടര്‍ന്ന് സ്വന്തം വീട്ടില്‍ നിന്നും ബന്ധുവീട്ടിലേക്ക് മാറേണ്ടിവന്നവര്‍ക്കും അധികൃതര്‍ ആവശ്യപ്പെട്ടതനുസരിച്ച് ഒഴിഞ്ഞുപോയവര്‍ക്കും സഹായം നല്‍കുന്ന കാര്യം പരിഗണിക്കും. ക്യാമ്പില്‍ താമസിച്ചിട്ടില്ലെങ്കിലും നാശനഷ്ടം സംഭവിച്ചവര്‍ക്ക് ആനുകൂല്യം ഉറപ്പാക്കും. കര്‍ക്കശ പരിശോധന നടത്തി മാത്രമേ ആനുകൂല്യങ്ങള്‍ നല്‍കുകയുള്ളൂ. ധനസഹായം കിട്ടുമെന്ന് മനസ്സിലാക്കി ക്യാമ്പിലേക്ക് വന്നവരുണ്ട്. അത് ഒഴിവാക്കാന്‍ പ്രളയ ദിവസങ്ങളില്‍ ക്യാമ്പിലെത്തിയവരുടെ പേരുവിവരങ്ങള്‍ കൃത്യതയോടെ ശേഖരിക്കണം.

വീടു വൃത്തിയാക്കുമ്പോള്‍ ദുരന്തത്തില്‍പ്പെട്ടവ ഏതൊക്കെ എന്ന് രജിസ്റ്ററില്‍ രേഖപ്പെടുത്തണം. വില്ലേജ് ഓഫീസറുടെയും തദ്ദേശസ്വയംഭരണ സെക്രട്ടറിമാരുടെയും ഉത്തരവാദിത്വമാണിത്. ഏതൊക്കെ വീടിനെ ബാധിച്ചു, ആരൊക്കെ ഒഴിഞ്ഞുപോകേണ്ടിവന്നു എന്നത് അടിസ്ഥാനമാക്കി മാത്രമാവും സഹായം. അത് റിപ്പോര്‍ട്ടു ചെയ്യാന്‍ ബന്ധപ്പെട്ട ഉദ്യോഗസ്ഥര്‍ക്ക് സാധിക്കണം. ദുരിതബാധിതരുടെ പട്ടിക തയ്യാറാക്കി പ്രസിദ്ധീകരിക്കണം.

മണ്ണിനടിയിലുള്ളവരെ കണ്ടെത്തുക എന്ന ശ്രമകരമായ ജോലിയാണ് ഇപ്പോള്‍ നടക്കുന്നത്. കവളപ്പാറയില്‍ നിന്ന് ഇന്ന് ഏഴു മൃതശരീരങ്ങള്‍ കണ്ടെത്തി.

Also Read: ഉജ്ജ്വല നേട്ടവുമായി റിയല്‍മി; ഒറ്റവര്‍ഷംകൊണ്ട് വിറ്റത് ഒരു കോടി സ്മാര്‍ട്ട്‌ഫോണുകള്‍

അപകടസാധ്യതയുള്ള കുന്നിന്‍പ്രദേശത്തുള്ളവരെ മാറ്റിപാര്‍പ്പിക്കുന്നതാണ് നല്ലത്. അങ്ങനെ മാറ്റിയതിന്‍റെ ഫലമായി രക്ഷപ്പെട്ടവരുണ്ട്. പുത്തുമലയില്‍ 17 പേര്‍ രക്ഷപ്പെട്ടത് അവരോട് മാറിത്താമസിക്കാന്‍ പറഞ്ഞതിനാലാണ്. റോഡ്, കനാല്‍, വീട് കെട്ടിടം എന്നിവ തകര്‍ന്നത് എത്രയും പെട്ടെന്ന് പുനസ്ഥാപിക്കാനാകണം. താഴ്ന്ന പ്രദേശങ്ങളിലെ കക്കൂസുകള്‍ തകര്‍ന്നത് ശരിയാക്കാന്‍ മുന്‍കൈയെടുക്കണം

മുഖ്യമന്ത്രിയുടെ ദുരിതാശ്വാസനിധിയുടെ പേരില്‍ പണം തട്ടിപ്പിനുള്ള നീക്കങ്ങള്‍ വിവിധ തലത്തില്‍ നടക്കുന്നുണ്ട്. അത് മനസ്സിലാക്കി ശക്തമായ നടപടി സ്വീകരിക്കാനാകണം. വെബ്സൈറ്റുമായി ബന്ധപ്പെട്ട വിവരങ്ങള്‍ക്ക് കൂടുതല്‍ പ്രചാരം കൊടുക്കും.

ക്യാമ്പുകളില്‍ പരാതികളില്ലാതെ ഭക്ഷണ വിതരണം നടക്കുന്നുണ്ട്. റേഷന്‍ വിതരണം തടസ്സപ്പെട്ടത് പുനസ്ഥാപിച്ചു. വൈദ്യുതി ബന്ധം തകരാറിലായ ക്യാമ്പുകളില്‍ മണ്ണണ്ണ ലഭ്യമാക്കിയിട്ടുണ്ട്. 1000 കോടിയിലധികം രൂപയുടെ കൃഷിനാശമാണ് കണക്കാക്കുന്നത്. 1,13,000 കൃഷിക്കാരെ പ്രളയം ബാധിച്ചിട്ടുണ്ട്. 28,000 ഹെക്ടര്‍ കൃഷിഭൂമിക്ക് നാശം സംഭവിച്ചു.

തദ്ദേശസ്വയംഭരണ വകുപ്പിന്‍റെ നേതൃത്വത്തില്‍ വീടുകളിലെയും പൊതുസ്ഥാപനങ്ങളിലെയും ശുചീകരണം വേഗത്തില്‍ നടക്കുണ്ട്. ആരോഗ്യവകുപ്പിന്‍റെ നേതൃത്വത്തില്‍ ബ്ലീച്ചിംഗ് പൗഡറും ക്ലോറിനും ആവശ്യാനുസരണം ലഭ്യമാക്കുന്നുണ്ട്. തകരാറിലായ കുടിവെള്ള വിതരണവും വൈദ്യുതി ബന്ധവും അതിവേഗത്തില്‍ പുനസ്ഥാപിച്ചുവരികയാണ്. മഴ കുറഞ്ഞതായി യോഗം വിലയിരുത്തി. എങ്കിലും ജാഗ്രത തുടരണം.

Also Read: കേരളത്തിന് പിന്തുണയുമായി കൊല്ലപ്പെട്ട ലാത്വിയന്‍ യുവതിയുടെ സഹോദരി; സമാനതകള്‍ ഇല്ലാത്ത നന്മ എന്ന് മുഖ്യമന്ത്രി

DONT MISS
Top