ജിഷയുടെ കൊലപാതകം: അന്വേഷണം വനിതാ എഡിജിപിക്ക്; എല്‍ഡിഎഫിന്റെ ആദ്യ മന്ത്രിസഭാ യോഗത്തില്‍ നിര്‍ണായക തീരുമാനങ്ങള്‍

pinarayi-1

തിരുവനന്തപുരം: പെരുമ്പാവൂരില്‍ ക്രൂരപീഡനത്തിന് ഇരയായ നിയമവിദ്യാര്‍ത്ഥിനി ജിഷയുടെ കൊലപാതകം എഡിജിപി ബി സന്ധ്യ ഐപിഎസിന്റെ നേതൃത്വത്തിലുള്ള പ്രത്യേക സംഘം അന്വേഷിക്കുമെന്ന് മുഖ്യമന്ത്രി പിണറായി വിജയന്‍. ജിഷയുടെ കൊലപാതകം നടന്ന് ഏകദേശം ഒരു മാസമായിട്ടും പ്രതിയെ പിടികൂടാന്‍ പൊലീസിന് സാധിക്കാത്ത സാഹചര്യത്തിലാണ് വനിതാ ഉദ്യോഗസ്ഥയുടെ നേതൃത്വത്തില്‍ പുതിയ അന്വേഷണസംഘത്തെ ചുമതലപ്പെടുത്തുന്നത്.

അതേസമയം ചികിത്സയില്‍ കഴിയുന്ന ജിഷയുടെ അമ്മ രാജേശ്വരിക്ക് സര്‍ക്കാര്‍ 5000 രൂപ വീതം മാസം പെന്‍ഷന്‍ നല്‍കാന്‍ തീരുമാനമായിട്ടുണ്ട്. നിര്‍മ്മാണം പുരോഗമിക്കുന്ന ജിഷയുടെ വീടിന്റെ പണികള്‍ 45 ദിവസത്തിനകം പൂര്‍ത്തിയാക്കും. ജിഷയുടെ സഹോദരി ദീപക്ക് ഉടന്‍ സര്‍ക്കാര്‍ ജോലി നല്‍കും. ജിഷയുടെ കൊലപാതകം സംബന്ധിച്ച് പൊലീസിന് വീഴ്ചയുണ്ടായോ എന്ന ചോദ്യത്തിന് അത് പരിശോധിക്കുമെന്നായിരുന്നു മുഖ്യമന്ത്രിയുടെ മറുപടി. ഇക്കാര്യത്തില്‍ വിശദമായി പഠിച്ച ശേഷം തീരുമാനമെടുക്കും.

വിവാദ ഉത്തരവുകള്‍ പരിശോധിക്കും

യുഡിഎഫ് മന്ത്രിസഭയുടെ അവസാന കാലത്ത് കൈക്കൊണ്ട നിയമവിരുദ്ധമായ നടപടികള്‍ പുന:പരിശോധിക്കുമെന്ന് മുഖ്യമന്ത്രി പറഞ്ഞു. ഇതിനായി നിയമ വകുപ്പ് മന്ത്രി എ കെ ബാലന്‍ കണ്‍വീനറായ മന്ത്രിസഭാ ഉപസമിതിയെ നിയമിച്ചു. ധനകാര്യവകുപ്പ് മന്ത്രി തോമസ് ഐസക് ഈ ഉപസമിതിയില്‍ അംഗമാണ്. ബാങ്ക് വഴിയുള്ള പെന്‍ഷന്‍ വിതരണം പുന: പരിശോധിക്കും. പ്ലാനിംഗ് ബോര്‍ഡ് നിലനിര്‍ത്തുമെന്നും 15-ആം പഞ്ചവല്‍സര പദ്ധതിയുമായി മുന്നോട്ടു പോകുമെന്നും മുഖ്യമന്ത്രി വാര്‍ത്താസമ്മേളനത്തില്‍ വ്യക്തമാക്കി.

സംസ്ഥാനത്തെ വിലക്കയറ്റം നിയന്ത്രിക്കാന്‍ കാര്യക്ഷമമായ നടപടികള്‍

സംസ്ഥാനത്തെ വില വര്‍ദ്ധനവ് പിടിച്ചുനിര്‍ത്താന്‍ വേണ്ട നടപടികള്‍ സ്വീകരിക്കും. സിവില്‍ സപ്ലൈസിന് കീഴിലുള്ള പൊതുവിതരണ സംവിധാനം കാര്യക്ഷമമാക്കുമെന്നും വിലക്കയറ്റം തടയാന്‍ അനുവദിച്ച തുക ഇരട്ടിയാക്കുമെന്നും മുഖ്യമന്ത്രി പറഞ്ഞു. ഇപ്പോള്‍ തന്നെ വൈകിയെങ്കിലും സംസഥാനത്തെ മഴക്കാല പൂര്‍വ്വ ശുചീകരണ പ്രവര്‍ത്തനങ്ങള്‍ അടിയന്തരമായി ആരംഭിക്കും.

ഒഴിവുള്ള തസ്തികകള്‍ പത്ത് ദിവസത്തിനകം റിപ്പോര്‍ട്ട് ചെയ്യണം

അപ്രഖ്യാപിക നിയമന നിരോധനം നിലനില്‍ക്കുന്നുണ്ടെന്ന് യുവജനങ്ങള്‍ പരാതി ഉന്നയിച്ച സാഹചര്യത്തില്‍ സര്‍ക്കാര്‍ തസ്തികകളിലെ ഒഴിവുകള്‍ പത്ത് ദിവസത്തിനകം റിപ്പോര്‍ട്ട് ചെയ്യാന്‍ എല്ലാ വിഭാഗങ്ങള്‍ക്കും നിര്‍ദേശം നല്‍കിയിട്ടുണ്ട്. ചീഫ് സെക്രട്ടറി തലത്തില്‍ ഇത് സൂക്ഷ്മമായി വിലയിരുത്തും. പിഎസ് സി മുഖാന്തരമല്ലാതെയുള്ള നിയമനങ്ങളിലെ ഒഴിവുകള്‍ സമര്‍പ്പിക്കാനും നിര്‍ദേശം നല്‍കും. അതോടൊപ്പം ഇത് സംബന്ധിച്ച പ്രായോഗിക ബുദ്ധിമുട്ടുകളും പിഎസ് സിയുമായി ചര്‍ച്ച ചെയ്യും.

മന്ത്രിമാര്‍ക്ക് നല്‍കുന്ന സ്വീകരണങ്ങള്‍ക്കുള്ള മാര്‍ഗനിര്‍ദേശം

മന്ത്രിമാര്‍ക്കും മറ്റും സ്വീകരണമൊരുക്കുമ്പോള്‍ വരവേല്‍ക്കുന്നതിനായി സ്ത്രീകളേയും കുട്ടികളേയും ഒഴിവാക്കണമെന്ന് നിര്‍ദേശം നല്‍കിയിട്ടുണ്ട്. കഴിവതും ഇത്തരം ചടങ്ങുകള്‍ ഒഴിവാക്കണമെന്ന് മുഖ്യമന്ത്രി നിര്‍ദേശിച്ചു.

DONT MISS
Top