റോബർട്ട് ഫിസ്ക്: ബിന്‍ ലാദനെയും രേഖപ്പെടുത്തിയ മാധ്യമ പ്രവര്‍ത്തകന്‍

പശ്ചിമേഷ്യയെക്കുറിച്ചുള്ള പടിഞ്ഞാറൻ മാധ്യമങ്ങളുടെ പ്രചാരങ്ങളെ ജേർണലിസത്തിലൂടെ തിരുത്തിയ മാധ്യമപ്രവർത്തകനായിരുന്നു റോബർട്ട് ഫിസ്ക്. ബാൽക്കൻ സംഘർഷങ്ങൾ, അറബ് വസന്തം, സെപ്തംബര് 11 ഭീകരാക്രമണം തുടങ്ങിയ അന്താരാഷ്‌ട്ര സംഭവങ്ങളുടെ റിപ്പോർട്ടിങ്ങിലൂടെ മാധ്യമ പ്രവർത്തന രംഗത്തെ നായക പരിവേഷത്തിലേയ്ക്ക് ഫിസ്ക് ഉയർന്നിരുന്നു. ഏകാധിപതികൾക്കെതിരെ ആർജവത്തോടെ തൂലിക ചലിപ്പിച്ച ഒരു മാധ്യമപ്രവർത്തകനെയാണ് ഫിസ്‌കിന്റെ നിര്യാണത്തിലൂടെ ലോകത്തിനു ഇപ്പോൾ നഷ്ടമാകുന്നത്. ഉസാമ ബിൻ ലാദനുമായി നടത്തിയ അഭിമുഖത്തെ തുടർന്നായിരുന്നു റോബർട്ട് ഫിസ്ക് എന്ന മാധ്യമ പ്രവർത്തകൻ ആഗോള ശ്രദ്ധ നേടിയത്. ഉസാമ ബിൻ ലാദനുമായി സംസാരിക്കുവാൻ സാധിച്ച ചുരുക്കം ചില പാശ്ചാത്യ മാധ്യമപ്രവർത്തകരിൽ ഒരാളായിരുന്നു ഫിസ്ക്. 1989 യിൽ ഇൻഡിപെൻഡന്റിൽ ലേഖകനായിരിക്കുമ്പോഴായിരുന്നു അദ്ദേഹം ഉസാമ ബിൻ ലാദനുമായുള്ള അഭിമുഖം നടത്തിയത്.

“സോവിയറ്റ് വിരുദ്ധ യോദ്ധാവ് തന്റെ സൈന്യത്തെ സമാധാനത്തിലേക്കുള്ള വഴിയിലേക്ക് നടത്തുന്നു” എന്ന തലക്കെട്ടായിരുന്നു ഉസാമ ബിൻ ലാദനുമായി നടത്തിയ ആദ്യ അഭിമുഖത്തിന് ഫിസ്ക് നൽകിയത്. ഉയർന്ന കവിൾത്തടങ്ങളും ഇടുങ്ങിയ കണ്ണുകളും നീളമുള്ള തവിട്ടുനിറത്തിലുള്ള മേലങ്കിയും കൊണ്ട് മുജാഹിദീൻ ഇതിഹാസത്തിന്റെ യോദ്ധാവിനെ ഓരോ ഇഞ്ചിലും കാണുന്നുവെന്നായിരുന്നു ഉസാമ ബിൻ ലാദനെക്കുറിച്ചു ഫിസ്ക് എഴുതിയത്. “ഒരു കൂട്ടം രാജ്യങ്ങളെ” തിരഞ്ഞുപിടിച്ചു “ജനാധിപത്യത്തെ വെറുക്കുന്നവർ” അല്ലെങ്കിൽ “തിന്മയുടെ കേർണലുകൾ” എന്നുള്ള അമേരിക്കൻ ഭരണകൂടത്തിന്റെ വാദങ്ങളെ ഫിസ്ക് പരസ്യമായി വിമർശിച്ചിരുന്നു. യുഎസ് ഭരണകൂടത്തിന്റെ പശ്ചിമേഷ്യൻ നയങ്ങളെക്കുറിച്ചു കൂടുതൽ സത്യസന്ധമായ ചർച്ചയ്ക്ക് ഫിസ്‌കിന്റെ വിമർശനങ്ങൾ പ്രേരിപ്പിക്കുകയും ചെയ്തു.

അമേരിക്കയ്‌ക്കെതിരെ നടന്ന സെപ്തംബര് 11 ആക്രമണത്തിന്റെ ഔദ്യാഗികമായ ചരിത്രരേഖയെക്കുറിച്ച് ഫിസ്ക് വ്യക്തിപരമായ സംശയങ്ങൾ പ്രകടിപ്പിച്ചിരുന്നു. 9/11 ആക്രമണത്തെക്കുറിച്ചുള്ള ബുഷ് ഭരണകൂടത്തിന്റെ വിവരണത്തിലെ പൊരുത്തക്കേടുകളിൽ അദ്ദേഹം അസ്വസ്ഥത പ്രകടിപ്പിച്ചിരുന്നു.
“വൈറ്റ് ഹൗസിന്റെ രഹസ്യസ്വഭാവമുള്ള സംസ്കാരം കാരണം യുണൈറ്റഡ് സ്റ്റേറ്റ്‌സിൽ സംശയങ്ങൾ വളരുകയാണ്. നമുക്ക് അറിയാത്ത ഒരുപാട് കാര്യങ്ങളുണ്ട്, ഒരുപാട് കാര്യങ്ങൾ നമ്മോട് പറയാൻ പോകുന്നില്ല. ഒരുപക്ഷേ ആ നാലാമത്തെ വിമാനം ഒരു മിസൈൽ തട്ടിയായിരിക്കാം തകർന്നത് “. 2006 ൽ സിഡ്നി സർവകലാശാലയിൽ നടത്തിയ പ്രസംഗത്തിൽ ഫിസ്ക് സെപ്തംബര് 11 ആക്രമണത്തെക്കുറിച്ചുള്ള തന്റെ ആശങ്കകൾ ഉന്നയിച്ചിരുന്നു.

സമാധാനവാദിയാണെന്ന് സ്വയം വിശേഷിപ്പിച്ച ഫിസ്ക് ഒരിക്കലും വോട്ട് ചെയ്തിരുന്നില്ല. സർക്കാരുകളെയും രാഷ്ട്രീയക്കാരെയും വെല്ലുവിളിക്കാനുള്ള ആർജവം ഒരു പത്രപ്രവർത്തകന് ഉണ്ടായിരിക്കണമെന്ന് അദ്ദേഹം അഭിപ്രായപ്പെട്ടിരുന്നു. “മാധ്യമപ്രവർത്തകർക്ക് വസ്തുനിഷ്ഠമായിരിക്കാമെന്ന തെറ്റിദ്ധാരണയുണ്ട്. അധികാരവും അധികാര കേന്ദ്രങ്ങളും നിരീക്ഷിക്കുകയെന്നതാണ് ജേണലിസം.” 2010 സെപ്റ്റംബർ 22 ന് ബെർക്ക്‌ലിയിലെ ആദ്യത്തെ കോൺഗ്രിഗേഷണൽ ചർച്ചയിൽ പങ്കെടുത്തുകൊണ്ട് അദ്ദേഹം അഭിപ്രായപ്പെട്ടിരുന്നു.

അദ്ദേഹത്തിന്റെ കാഴ്ചപ്പാടുകളുടെ ചുവടുപിടിച്ചുകൊണ്ടു ഫിസ്കിംഗ് എന്ന ബ്ലോഗോസ്ഫിയർ സ്ലാങ്ങും ഉണ്ടാക്കിയിട്ടുണ്ട്. ലേഖനം അല്ലെങ്കിൽ ഉപന്യാസത്തിലെ വിശകലനത്തെ തർക്കിക്കുന്ന ഒരു പോയിന്റ്-ബൈ-പോയിന്റ് വിമർശനത്തെ വിവരിക്കുന്ന ഒരു ബ്ലോഗോസ്ഫിയർ സ്ലാങ്ങാണ് ഫിസ്കിംഗ്. ഫിസ്കിന്റെ കാഴ്ചപ്പാടുകളോട് വിയോജിപ്പുള്ള വിവിധ ബ്ലോഗുകളിൽ നിന്നാണ് ഈ പദം ഉത്ഭവിച്ചത്.

1970 കളിലെ വടക്കൻ അയർലൻഡ് പ്രശ്‌നങ്ങൾ, 1974 ലെ പോർച്ചുഗീസ് വിപ്ലവം, ലെബനൻ ആഭ്യന്തരയുദ്ധം, 1979 ലെ ഇറാനിയൻ വിപ്ലവം, അഫ്ഗാനിസ്ഥാനിലെ സോവിയറ്റ് യുദ്ധം, ഇറാൻ-ഇറാഖ് യുദ്ധം, ഗൾഫ് യുദ്ധം, ബോസ്നിയൻ യുദ്ധം, അൾജീരിയൻ സിവിൽ യുദ്ധം, കൊസോവോ യുദ്ധം, 2001 ലെ അഫ്ഗാനിസ്ഥാനിലെ അന്താരാഷ്ട്ര ഇടപെടൽ, 2003 ൽ ഇറാഖ് അധിനിവേശം, 2011 ലെ അറബ് വസന്തം, സിറിയയിലെ ആഭ്യന്തര യുദ്ധം തുടങ്ങിയവയുടെ റിപ്പോർട്ടിങ്ങിലൂടെ “ബ്രിട്ടനിലെ ഏറ്റവും പ്രശസ്തനായ വിദേശ ലേഖകൻ” എന്ന വിശേഷണത്തിനും അദ്ദേഹം അർഹനായി.

ബ്രിട്ടീഷ് പ്രസ് അവാർഡിന്റെ ഇന്റർനാഷണൽ ജേണലിസ്റ്റ് ഓഫ് ദി ഇയർ ഏഴ് തവണ ഫിസ്കിന് ലഭിച്ചിട്ടുണ്ട്, കൂടാതെ രണ്ടുതവണ “റിപ്പോർട്ടർ ഓഫ് ദി ഇയർ” അവാർഡും നേടി. 1992 ൽ “ദി അദർ സൈഡ് ഓഫ് ഹോസ്റ്റേജ് സാഗ” എന്ന റിപ്പോർട്ടിന് 1992 ൽ ആംനസ്റ്റി ഇന്റർനാഷണൽ യുകെ മീഡിയ അവാർഡുകളും അദ്ദേഹത്തിന് ലഭിച്ചു.

“ഫ്രം ബെയ്‌റൂട്ട് ടു ബോസ്നിയ” എന്ന മൂന്ന് ഭാഗങ്ങളുള്ള ഒരു ഡോക്യുമെന്ററി പരമ്പര 1993 ൽ ഫിസ്ക് നിർമ്മിച്ചിരുന്നു. പടിഞ്ഞാറിനെ എന്ത് കൊണ്ട് മുസ്ലിങ്ങൾ വെറുക്കുന്നു എന്ന് കണ്ടെത്താനുള്ള ശ്രമമാണ് ഡോക്യൂമെന്ററിയിലൂടെ അദ്ദേഹം നടത്തിയത്. ഡിസ്കവറി ചാനൽ തുടക്കത്തിൽ ഡോക്യുമെന്ററി പൂർണ്ണമായി സംപ്രേക്ഷണം ചെയ്‌തെങ്കിലും ഇസ്രായേലി അനുകൂല ഗ്രൂപ്പുകളുടെ പ്രചാരണത്തെ തുടർന്ന് ഡോക്യൂമെന്ററിയുടെ സംപ്രേക്ഷണം നിർത്തിവെച്ചതായി അദ്ദേഹം ആരോപിച്ചിരുന്നു.

.